Stúdó

Dautt?

2006-02-01T17:24:00.000Z

Já það er dautt, þetta blogg, en þó ekki dauðara en svo að hér er ég að skrifa handónýta færslu inn á það. Ég segi handónýt, en munið þó að þetta er engu að síður færsla, sem kemur okkur aftur á byrjunarreit. Ef ég sit hér í mínum frítíma og skrifa handónýta færslu inná ólesið blogg, er það þá ekki samt á lífi þrátt fyrir léleg gæði og fáa, ef einhverja, lesendur? Nú eru flestir samlandar mínir að horfa á landsleikinn í handbolta, en ég fórna þeim sjálfsagða rétti mínum til þess eins að skrifa inná þetta forláta blogg. Og til hvers spyr maður sig (nema þá að kona sé)??? Jú. mikið rétt, til þess eins að sanna fyrir ykkur (ef einhver eruð þ.e.a.s.) að þetta blogg er ekki alveg dautt. Nú er ég þess þó handviss að þessi ákveðna færsla á eftir að standa hér efst á síðunni gríðarlega lengi áður en ég finn það aftur í hjarta mínu að leifa ykkur að þreifa á henni púlsinn aftur, því eins og áður sagði þá efast ég stórlega um tilvist nokkurs lesanda.

Góðar stundir

Saumo!!

2005-12-20T22:50:00.000Z

Minni á kerlinga-samkunduna annað kvöld!

Góðar stundir

HEY!!!

2005-12-16T20:26:00.000Z

Af hverju er ég sú eina sem get skrifað á þessa síðu??? Þeir sem vilja leggja framlög á síðuna okkar sendið mér bara sms eða meil og ég sendi ykkur lykilorðin um hæl.

Góðar stundir

PS. Meilið mitt er frk1@hi.is

Litlu jolin!

2005-12-13T15:31:00.000Z

Ekki gleyma litlu jólunum okkar sem haldin verða heima hjá Hildi á föstudaginn kemur (16.des). Þeir sem eiga jólatónlist eru vinsamlegast beðnir um að hafa hana meðferðis, en hafa ber í huga að snyrtilegur klæðnaður skal í hávegum hafður, enda jólin hin mesta hátíð og aldrei meira tilefni til að klæða sig upp.

Minnislisti:

- Litlu jólin
- Snyrtilegur klæðnaður
- Jólatónlist
- Baldursgata 9 (heima hjá Hildi)
- Klukkan 2100 stundvíslega
- Bros
- Söngur
- Allir að mæta!!!

Góðar stundir.

Saumoskvisur

2005-12-08T15:54:00.000Z

Jæja dömur, þá er það ákveðið að saumó verður haldið hjá mér þann 21.des klukkan 2000. Endilega allar að mæta! U know the place.

Kv,
Fríða

Góðar stundir

Þið eruð öll glæsileg!

2005-12-04T00:12:00.000Z

Frábær lokasýning og gríðarhress salur! Húmornum var gefinn laus taumur á þessari síðustu sýningu okkar og allir gáfu sína síðustu orkudropa í sýninguna og gerðu hana eftirminnilega með öllu. Þá var mætingin í lokateitið gríðargóð en húsið var fullpakkað. Ég vil þakka ykkur öllum kærlega fyrir frábært kvöld, mikið rosalega skemmti ég mér vel.

Hitt málið á dagsskrá er sú hugmynd sem fæddist einhverri í gær að við stúlknahelmingurinn stofnuðum sauma-/matarklúbb! Áætlað er að fyrsti hittingur verði strax eftir próf, svo nú er bara spurning hvenær allar eru búnar í prófum... Endilega kommentið á þetta og nefnið þá daga sem þið komist.

Góðar stundir

Lokasyning

2005-12-02T17:00:00.000Z

Jæja, þá er komið að því. Sýningaferlið er á enda runnið og markar sýning klvöldis endalokin fyrir okkar ástkæra verk Blóðberg. Nú er því síðasti séns fyrir okkur að gera gloríur, slá í gegn eða brotna saman og bresta öll sem eitt í grát.... Að því loknu minni ég á lokasýningarteiti heima hjá Fríðu í kvöld, mættu eða vertu ferningur!!!

Góðar stundir

P.S. Ég geri mér grein fyrir því að það er hippi að vera ferningur, en hver vill svo sem vera hippi?

jæja,

2005-11-29T14:42:00.000Z

þá eru allir að komast í jólaskap, fyrsta aðventan gengin yfir með allri sinni dýrð og friður jólanna farinn að kítla lítil hjörtu nær og fjær. Af hverju andliti skín fallegt bros og gjafmildir fingur seilast eftir veskjum sínum til að styrkja hin ýmsu góðu málefni sem auðmjúkir einstaklingar samtaka af öllum toga brosa þakklátir yfir, enda ekki vanþörf á fé í hin ýmsu verkefni. Á meðan að ég hvet alla til að gefa af einlægni og örlæti til allra góðra málefna þá minni ég engu að síður á að geyma 1000-1500 (háskólanemar-aðrir) fyrir miða á síðustu sýningar Blóðbergs, en nú eru aðeins tvær slíkar eftir.

Góðar stundir.

P.S. Ekki gleyma að setja pakka undir mæðrstyrks-jólatrén í Kringlunni og Smáralind!!

Börn og Bloðberg

2005-11-22T00:29:00.000Z

Í lífi hvers leikara gerast undur og stórmerki í hvert skipti sem hann/hún fær þann heiður að taka þátt í uppsetningu leikverks. Við sem hópur höfum sannarlega verið vitni stórkostlegra atburða þessa önnina, jafnt á sviði sem af, og núna á laugardaginn bættist kraftaverk í hóp þessara yndislegu atburða. Það gerðist nefnilega ekki minni hlutur en sá að einn okkar ágætu leikara hlaut titilinn pabbi, en honum Hinna okkar fæddist lítil dóttir, lítill bjartur sólargeisli á dimmum vetri. Vil ég nýta þessa aðstöðu mína hér til að óska þeim skötuhjúum innilega til hamingju með erfingjann fyrir hönd alls hópsins, en þykist ég fullviss þess að við bíðum öll með eftirvæntingu þess að fá að sjá litla krílið holdi klætt.

Og ekki gleyma að öll börn eru englar og englar hafa barnshjörtu!

Góðar stundir

skammir

2005-11-20T05:26:00.000Z

Ég fékk réttmætar skammir í kvöld vegna þess hve ömurlegur bloggari ég hef verið undanfarið. Já það verður ekki hjá því komist að viðurkenna það að ég er aumingi. Það liggur enginn vafi á því. Eina vafamálið er það hvort mér sé gerlegt að bæta mig og þá hvort ég eigi rétt á því að lifa yfir höfuð. Þið, ágætu lesendur (ef þið eruð þá til), verðið að vera dóamarar þess. Núna er hins vegar nokkuð klárt að þessi ölvaða kona þarf að fara að koma sér í háttinn.

Góðar stundir.

P.S. Takk fyrir kvöldið kæru vinir, ég skemmti mér konunglega í kvöld.

frumsyningin buin

2005-11-08T22:28:00.000Z

Jæja litlu snúðarnir mínir, þá er frumsýningin farin, búin og dáin. Hvernig hún gekk verður hver að dæma fyrir sig en það veit ég eitt að við leikaragengið skemmtum okkur konunglega og til þess er nú einmitt frumsýningarkvöldið gert, er það ekki? Eftir sýninguna drekktum við okkur í glaum og gleði sem stóð langt fram á morgun og vel það. Nú þegar við erum öll komin aftur til lífsins mun sýningin halda áfram göngu sinni og vonandi gleðja aðra en bara leikarana á leiðinni.

Miðasala er svo í Loftkastalanum fyrir áhugasama!!!

Góðar stundir.

WOW

2005-11-05T13:29:00.001Z

hvað það verður gaman hjá okkur í dag!!

Góðar stundir.

Spennan eykst

2005-11-02T14:53:00.000Z

Á æfingu í gærkveldi gekk allt gríðarvel. Þar var hafður reykur við hönd sem og kerti og ljósabúnaður notaður til hins ýtrasta. Mikil áhersla hefur svo verið löggð á það að leikarar standi í ljósinu, sérstaklega sé aðeins einn lítill ljóspollur á sviðinu þegar þeir eru að leika því þá er sá hinn sami pollur að öllum líkindum þarna fyrir viðkomandi leikara.
Á æfingunni í dag mun svo mikil áhersla vera löggð á reipuhnútabindingar og sjálfsbjargartækni. Eltar munu uppi rottur og haldin keppni í því hver eldar hana best með þeim takmörkuðu hráefnum sem við munum hafe við hönd, þ.e. pappaspjald, skóreim, nagli, efnispjatla (rauðrósótt, að sjálfsögðu) og að lokum vanillusykur, en hann er ómissandi í alla matargerð. Komið ykkur nú í keppnisskapið því vinninghafinn fær að syngja einsöng á frumsýningunni!

Góðar stundir

hvur fjarinn

2005-10-31T22:35:00.000Z

Ég var búin að skrifa þvílíkar bókmenntir um atburði helgarinnar sem og komandi atburði okkar ágæta leikhóps, en þegar ég svo ætlaði að birta það datt allt út. Þar af leiðandi mun ég aðeins birta mjög stytta útgáfu:

Helgin = hluti leikhópsins fór að sjá Forðist Okkur og vakti sýningin mikla lukku, gríðarskemmtileg og uppsetning til fyrirmyndar. Eftir það var farið ýmist upp í Loftkastala að huga að ljósabúnaði eða í hrekkjavökupartý til Gísla, eða bæði.

Framundan = Það styttist óðum í frumsýningu (sjá hér til hægri), um að gera fyrir áhugasama að fara að huga að því að taka frá nóvemberkveld og redda sér miða til að sjá hið dularfulla leikrit Blóðberg.

Áminning = Nú fer hver að verða síðastur að kaupa auglýsingu í leikskránni. Viðkomandi verða að ganga frá þeim málum/viðskiptum við Tryggva fyrir miðvikudag.

Góðar stundir.

í dag

2005-10-26T16:42:00.000Z

Á æfingunni í dag munum við maka okkur út í súkkulaði og láta það harðna. Þá munum við brjóta það utan af okkur og reyna að púsla saman brotunum í risastórar súkkulaðistyttur.

Góðar stundir

gangur mala

2005-10-25T23:58:00.000Z

Það gengur allt framar vonum núna á nýja sviðinu okkar, Aggi er vitsmunavera mikil og hefur með útsjónasemi sinni fundið leiðir til að vinna með nýja rýmið sem er harla ólíkt því upprunalega. Já, nú er alvaran hafin enda ekki nema ellefu dagar í frumsýningu og ekki seinna vænna að vera með sviðsmál á hreinu.

Hitt er svo málið á dagskrá að allir verða (fyrir annað kvöld) að hafa skráð sig á listann hjá Ólöfu um hverjir ætla með í leikhús á laugardaginn. Vonanadi komast sem flestir, enda fáum við miðann líkast til á 1000 sem þykir nú ekki mikið!

Góðar stundir.

tilhendingar

2005-10-21T15:11:00.000Z

Þá er enn einu sinni búið að henda okkur til eins og laufum að hausti. Nú er útlit fyrir að sýningin verði á sviði Loftkastalans en ekki í skemmunni eins og áður var talið svo sviðsmyndin okkar verður að sæta endurskoðun þar sem hún var sniðin fyrir skemmuna. Nú vantar okkur því stillansa, bara svona ef lesandi skildi eiga slíkt á glámbekk. En við erum seigur hópur og látum þetta ekki á okkur fá, ó sei sei nei nei.

Góðar stundir.

nyjung

2005-10-18T14:47:00.000Z

Undur og stórmerki tækninnar hafa gert okkur það mögulegt að skoða ljósmyndir á tölvuskjánum og af því tilefni hef ég sett einn lítinn hlekk hér til hliðar á nokkrar myndir sem teknar voru um helgina. Ef einhver er með meira af myndum, hvort heldur sem er frá þessum eða öðrum viðburðum leikhússins, nú eða jafnvel bara af æfingum, þá má endilega senda mér linkinn og ég skal setja hlekk á þær hér til hliðar hjá þessum sem þegar er kominn hérna til hægri undir merkinguna myndir sem er auðvelt að sjá ef þér kunnið að lesa, það er mjög skýrt og greinilegt hér til hliðar með ljósu letri svo það sjáist vel á dökkum grunninum og er hér hægra megin við færslurnar sem raðast hver upp á aðra, sú nýjasta efst og sú elsta neðst og svo allir hlekkir til hægri (öfugt við vinstri) við þær, ekki bara myndahlekkir heldur allir hlekkir.

Góðar stundir.

Lu blah

2005-10-16T19:52:00.000Z

Það átti að vera sunnudagsfrí í dag svo allir kæmust í fjölskylduboð að eta sunnudagssteik, en sökum skyndilegs rafmagnsleysis á laugardeginum var æfingunni frestað um einn dag. Þetta small eins og vagn við hest við plön leikflokksins en háttvirtur formaður okkar, herra Tryggvi, hélt upp á kvartaldarafmæli sitt þetta ágæta kveld (óskum við honum auðvitað öll innilega til hamingju með það - einn, tveir og; TIL HAMINGJU TRYGGVI!!). Í teiti þessu voru nokkrir aðilar sem sýndu sínar huldu hliðar, sumir grétu sáran vegna þeirra kvala sem ástin hefur í för með sér, aðrir giftu sig og enn aðrir skölluðu þakrennur, allt í anda væminar ástar - þema kveldsins.
En svo við snúum okkur aftur að æfingaferlinu þá er styst frá því að segja að í dag, þenna forláta dag sunnunar, var haldið rennsli. Þetta gekk bara ágætlega, en Agga fannst við eitthvað kraftlaus samt. Skelþunnir leikararnir horfðu hver á annan furðu lostnir og ypptu öxlum. En jújú, við lofuðum meiri krafti og minni þynnku næst.
Við verðum bara að reyna að sporna við því að næsta partý lendi á æfingahelgi, nú eða að næstu æfingar lendi ekki á partýhelgi kannski.

Góðar stundir

buningar

2005-10-13T13:56:00.000Z

Nú þurfa allir að vera farnir að leggja höfuð sitt í bleyti því á laugardaginn munu búningar sem og props þurfa að vera tilbúið. Er það alfarið á ábyrgð hvers og eins að skapa sinn karakter svo það er um að gera að vanda til verks og hafa góða persónusköpun í huga. Hafa skal þó í huga að of mikil frjósemi hugans getur verið bestu mönnum að falli.

Góðar stundir tundir undir ndir dir ir r

sunnudansæfing.

2005-10-10T14:58:00.000Z

Það stóðu sig allir eins og hetjur í gær og dönsuðu margir frá sér allt vit og rænu. Sveiflan var af suðrænum toga en farið var í grunnskref mambo dansins góða sem félagar okkar þau Patrick Swayze og Jennifer Grey gerðu svo ódauðlegan hér um árið í mynd sinni um skítuga dansa. Nánari lýsing mundi kannski vera hægri-stíga-saman, vinstri-stíga-saman, hægri fram-stíga-saman, vinstri aftur-stíga-saman, og svo snúningur......
Já já já já, þarna iðuðum við eins og býflugur í búi um gólfið og létum lifandi drumbutónana heltaka okkur í djúpum transi. Fyrst hver fyrir sig og svo í pörum. Þegar allir voru svo orðnir algjörlega dáleiddir smellti Aggi fingrum og við, í fullkominni hlýðni, fórum upp á sviðið og afklæddum okkur nokkrum sinnum í skæru sviðsljósinu.

Góðar stundir

hhmmmm

2005-10-09T13:59:00.000Z

Það var stór æfing í gær, laugardag, þar sem sett voru upp nokkurs konar drög að sviðum og í framhaldi af því var farið í fyrsta rennsli á því sem komið er. Það gekk nú bara ágætlega og var gaman að sjá loks móta fyrir því sem koma skal þegar allt smellur saman að lokum. Fyrir þá sem ekki vita að þá byggir leikritið, Blóðberg, á kvikmynd og segir ólíkar sögur nokkurra manneskja á sama tímapunkti. Sögurnar tvinnast svo saman (sumar meira, aðrar minna) í hádramatíska heildarmynd.
Í dag mun svo aftur verða æfing í stærra laginu þar sem allir eiga að mæta, en ég veit hins vegar ekki nákvæmlega hvað Aggi hyggst gera með okkur í dag. Á æfingaplaninu stendur söngur og dans, en það mun bara verða að koma í ljós á eftir.

Góðar stundir.

hopæfing

2005-10-07T14:40:00.000Z

Í kveld mun verða hin stóra hópæfing þar sem leikararnir, allir sem einn, mæta galvaskir í Loftkastalann og láta ljós sitt skína sem aldrei fyrr. Æfingin verður löng og hún verður krefjandi en ennfremur árangursrík og hellst af öllu skemmtileg. Skemmtun, skemmtanir, skemmtilegt. Já, skemmtanagildi hluta er nefnilega gríðarlega mikilvægt. Nú ef maður væri ekki manns gaman, altso hefði ekkert skemmtanagildi, væri engin ástæða til að hópa sig saman og setjast inn í byggingu fulla af öðrum hópum til þess eins að horfa á enn annan hópinn leika hóp af tilbúnum mönnum (einn hópur til viðbótar í sjálfu sér). Nú ef þá hlutir, eins og til dæmis leikrit, hefðu ekkert skemmtanagildi af einni eða annari gerð og stærðargráðu, væri engin eftirspurn eftir þeim og þar sem samvera við annað fólk hefði á annað borð ekkert skemmtanagildi, væri hvort eð er enginn sem hefði áhuga á að leggja fyrir sig leiklistina og mæta á æfingarnar. Því er eins gott að það verði skemmtilegt á æfingunni. Ekki það að ég sé að setja pressu á neinn.

Góðar stundir.

One on one

2005-10-05T09:33:00.000Z

Nú standa yfir miklar maður á mann æfingar og er því ekki frá ýkja mjög mörgu að segja annað en að það gengur vel og allt er að því er virðist á áætlun. Á föstudag á svo vera ein stór æfing, allir að mæta!
Um helgina verða söng- og dansæfingar sem beðið er með eftirvæntingu af öllum sem einum. Nú er bara að rifja upp salsa taktana og suðrænu mjaðmasveiflurnar.... Ariba!!!!

Góðar stundir.

Helgin

2005-10-03T22:04:00.000Z

Þá er helgin liðin með sinni skálaferð og herlegheitum. Sérlegur bloggritari Stúdentaleikhússins þetta misserið var hins vegar ekki þess heiðurs aðnjótandi að vera viðstödd, enda þekkt fyrir seinheppni af bestu gerð. Fregnir af ferðinni munu því þurfa að bíða þar til frekari heimildaöflun hefur átt sér stað, en það ætti jafnvel að verða í kveld. Spenntum er því sem áður bent á að fylgjast vel með hér á síðunni.
Hvað æfingar varðar var þeim eðlilega slegið á frest yfir helgina vegna ferðarinnar og er því ekki frá neinu að segja þaðan í bili, en þeim mun hinsvegar haldið áfram í kveld undir tryggri stjórn Agga, okkar frábæra leikstjóra.

Fleira er ekki í fréttum í kvöld, við sjáumst aftur á morgun. Veriði sæl.

Góðar stundir.

Sussumsvei!

2005-09-30T10:33:00.000Z

Í gær gerðust einhvurjir ónefndir aðilar svo kræfir að skrópa á æfingu (!) sem varð til þess að ekki var hægt að æfa allt sem æfa þurfti. Þetta olli miklum geðshræringum og tók það langan tíma að hugga nokkrar aumar sálir sem hjúfruðu sig út í horn og reyndu að bæla niður kæfandi ekkasogin, emjandi inn á milli: "af hverju, af hverju?!". Að öðru leiti gekk allt afskaplega vel.

Mikil stemning tók að hreiðra um sig vegna hinnar stórbrotnu skálaferðar sem hópurinn hyggst fara í þessa ágætu helgi. Munum við að sjálfsögðu vera stillt og prúð og haga okkur sérlega skikkanlega í ferð þessari sem og ávalt. Hver veit svo nema að það komi eilitlar fréttir af atburðinum eftir helgi...

Góðar stundir.

Fyrsti kapituli

2005-09-29T10:22:00.000Z

Blóðbergs-liðið er í þessum töluðu (nú eða skrifuðu, allt eftir því hversu lifandi þín upplifun er, lesandi góður) orðum að sökkva æ dýpra í hyldýpi frjórra hugsana og listræns flæðis og munu ekki berja yfirborðið augum fyrr en seint og síðar meir, eða í byrjun nóvember.
Aðeins nokkrar fyrstu senurnar eru komnar í fulla vinnslu, enda ekki nema örfáir dagar síðan æfingar hófust, og því enn ekki allir þátttakendur (ég elska þetta orð, svo fullt af téum að það er ekki hægt annað en að finnast sem maður hafi fest ritvillu á blað) komnir inn í þessa hringiðu vitfirringar. Að þessu sögðu hvet ég þig, lesandi góður, til að fylgjast með framvindu mála hér á síðunni.

Góðar stundir.

Stúdentaleikhúsið

2005-09-26T14:34:00.000Z

Stúdentaleikhúsið hefur opnað heimasíðuna http://sl.hi.is